من الاخت وردة المغربية
حلوة طابع الوردة باللوز
مقادير: حلوة طابع الوردة باللوز
للعجين:
250غ دقيق الفورص الخاص بالحلويات
قبصة ملح
ملعقة كبيرة النشا (مايزينا)
100غ السكر كلاصي
2 أصفر البيض
125غ زبدة العبار وتكون لينة
العقدة اللوز:
رابعة اللوز منقي و مطحون مع 100غ سنيدة
الماء الزهر
قبيصة المسكة الحرة مدقوقة (اختيارية)
ملعقة كبيرة زبدة لينة
ملعقة كبيرة كونفتير الليمون (البرتقال)
قشرة ليمونة محكوكة
الطريقة: حلوة طابع الوردة باللوز
نحضر العقدة اللوز من الأحسن نهار من قبل نصلق اللوز و نقشرو و نشفو مزيان و نطحنو مع سنيدة وشوية الزهر و ملي يبان ليا تطحن نزيد الزبدة فالطحانة باش تدخل فيه ونكمل الطحن باش تجي العقدة معلكة مزيان.نضيف ليه المسكة و الكونفتير و القشرة الليمون و نخلط و نعمل من العقدة كويرات صغار و نخليهم جانبا
نوجد العجينة .نخلط الزبدة مع السكر كلاصي حتى تولي كريمة نزيد الدقيق و قبصة الملح و المايزينا و نخلط .و في الأخير نجمعها بأصفر البيض…
نعمل منها كويرات ونخليها ترتاح شوية
نطلق العجينة بالدلاك على سطح طاولة مغطية بالبلاستيك الغدائي و مرشوشة بالنشا
نقطعها بالمرشم دوائر
ناخد كل دائرة نعمل وسطها كويرة من العقدة و نجمعها و نشكلها على شكل كويرة بحال كيف مبين فالصورة
نحط الكويرة المحشية باللوز فالطابع و نرشمها بهاد الشكل اللي فالصورة
كتعطينا شكيل الوردة مثقوبة من الوسط
نستف الوريدات فوق لاطة مغطية بالورق السولفيريزي و ندخلها للفرن سخون و نخليها حتى تطيب و تاخد لون دهبي ما خاصهاش تتحمر بزاف
ملي نخرجوها من الفرن نخليها تبرد و نغبرها بالسكر كلاصي من فوق
نوجد كونفتير الليمون و نصفيه ناخد غير السائل نزيد عليه قشرة ليمونة محكوكة باش يزيد يبان المداق دالليمون أكثر
نصبو فكاصرونة فوق النار و نزيد عليه الكلوكوز و نخليه يغلي
نعمر بيه الثقوب ديال الوريدات
و ها الحليوة ديالنا واجدة بالصحة و الراحة
هادي صورة الطابع اللي استعملت لهاد الحلوة
Put the internet to work for you.
إرسال تعليق